राष्ट्रिय चित्रकला प्रतियोगितामा दीप बोर्डिङका सम्राट प्रथम
बुटवल पुरुषोत्तम पाण्डेय राष्ट्रिय बाल दिवस–२०७८ को अवसरमा नेपाल बाल सङ्गठन केन्द्रीय समितिले राष्ट्रिय स्तरमा आयोजना गरेको चित्रकला प्रतियोगिताको जुनियर तर्फ दीप बोर्डिङ हाई स्कूल बुटवलको कक्षा ६ मा अध्ययनरत छात्र सम्राट श्रेष्ठ प्रथम भएका छन् ।
नेपाल बाल सङ्गठन जिल्ला शाखा रुपन्देहीले आयोजना गरेको जिल्ला स्तरीय चित्रकला प्रतियोगितामा द्वितीय स्थान हासिल गर्दै राष्ट्रिय स्तरको प्रतियोगितामा सहभागी भएका उनले देशैभरिका बाल चित्रकारलाई पछि पार्र्दै प्रथम हुन सफल भएका हुन् । राष्ट्रिय स्तरको चित्रकला प्रतियोगितामा जिल्ला स्तरमा भएका प्रतियोगितामा प्रथम, द्वितीय, तृतीय र चतुर्थ हुन सफल चित्रकार विद्यार्थीहरूले भाग लिएका थिए ।
प्रथम भएसँगै सम्राट श्रेष्ठले राष्ट्रपति विद्यादेवी भण्डारीका हातबाट नगद रु १५ हजारका साथ प्रमाणपत्र प्राप्त ग्रहण गरेका छन् । उनले जिल्ला स्तरीय प्रतियोगितामा द्वितीय हुँदा नगद रु ५ हजारसहित प्रमाणपत्र प्राप्त गरेका थिए ।
नेपाल बाल सङ्गठनले कक्षा ६ सम्म जुनियर र कक्षा ६ देखि कक्षा १० सम्मको सिनियर समूह बनाई प्रतियोगिता आयोजना गरेको थियो । जिल्ला स्तरीय सिनियर चित्रकला तर्फ दीप बोर्डिङ हाई स्कूलकै कृष राना प्रथम भएका थिए ।
Comments
Post a Comment