शपथ ग्रहण सम्पन्न

स्थानीय सरकार सञ्चालन ऐन २०७४ को दफा १०२ को उपदफा   (१) बमोजिम बुटवल उपमहानगरपालिकाको भाषा,साहित्य,कला, संस्कृति प्रतिष्ठान स्थापना तथा सञ्चालन गर्न बनेको ऐन २०७५ अनुसार विद्वत सभाका सदस्यहरुमध्येबाट १३ सदस्यीय विद्वत परिषद् गठन भएको छ ।

मनोनित परिषदका सदस्यहरुका निम्ति आयोजित शपथ ग्रहण कार्यक्रमका प्रमुख अतिथि प्रतिष्ठानकाप्रमुख संरक्षक एवम् बुटवल उपमहानगरपालिकाका प्रमुख शिवराज सुवेदीले बुटवलक्षेत्रकोभाषा,साहित्य,कला र संस्कृतिको संरक्षण एवम् सम्वद्र्धनका निम्ति उक्त प्रतिष्ठान गठन गरिएको बताउँदै भौतिक विकासले मात्र मानवीय विकास सम्भव नभएको बताए ।

बुटवलको भाषा,साहित्य,कला,संस्कृतिलाई पहिचान गराउन,प्रसिद्धि उन्मुख गराउन र सबैका बीचमा पुराउनका निम्ति प्रतिष्ठान अग्रसर हुन र सोही अनुसार अघि बढ्न नगर प्रमुख सुवेदीले अनुरोध गरेका छन् । उनले विद्वत परिषद्का अध्यक्ष झपेन्द्रबहादुर जीसीलाई शपथ ग्रहण गराएका छन् भने बाँकी सदस्यहरुलाई अध्यक्ष जीसीले शपथ ग्रहण गराएका छन् । 

साथै सिफारिस समितिका संयोजक,प्रतिष्ठानकी संरक्षक एवम् बुटवल उपमहानगरपालिकाकी उपप्रमुख गुमादेवी आचार्यले बुटवलको भाषा,साहित्य,कला र संस्कृतिलाई संरक्षण गर्दै देशकै नमूना पालिका बनाउनका निम्ति प्रतिष्ठान कोसेढुंगो हुने बताइन् । प्रमुख प्रशासकीय अघिकृत शिवप्रसाद रेग्मी,वरिष्ठ अधिकृत भुवाप्रसाद लुईटेल लगायतले बुटवल क्षेत्रको भाषा,साहित्य,कला र संस्कृतिको विकासका निम्ति प्रतिष्ठानसँग रहेर अघि बढ्ने प्रतिवद्धता जनाएका छन् । 

भाषा,साहित्य,कला,संस्कृति प्रतिष्ठान गठन गरी अघि बढेको र शपथ ग्रहण कार्यक्रम सम्पन्न गरेकोमा बुटवल उपमहानगरपालिकालाई हार्दिक धन्यवादज्ञापन गर्दै आर्थिक वर्ष २०७८÷२०७९ का निम्ति कार्ययोजना बनाउन अध्यक्षलाई जिम्मा दिइएको र अर्को बैठकमा छलफलका लागि पेश गर्न पहिलो बैठकले निर्णय गरेको छ । 

उक्त विद्वत परिषदमा उपाध्यक्ष लक्ष्मी गुरुङ,सचिव दलबहादुर गुरुङ,कोषाध्यक्ष सीता काफ्ले,सदस्यहरुमा डा.शालिकराम पौड्याल,चिरन बराल,चौतारेप्रसाद थारु,इन्दिरा अर्याल,बीरेन्द्र अग्रहरी, झबिन्द्र थापा,नारायण थापा,कपिल ज्ञवाली र रामचन्द्र श्रेष्ठ मनोनित भएका छन् । साथै ४६ जना विद्वत सभामा सदस्यहरु मनोनयन भइसकेका छन् भने बाँकी पाँच जना सदस्यहरु सभाले मनोनयन गर्ने व्यवस्था छ ।